قوانين العقل الباطن

 الإنسان الطبيعي عقله بـ ينقسم لـ جزئين 

١- عقل الوعي
٢- عقل اللاوعي [ العقل الباطن ]

ـــــــــــــــــــــــــــــــــــــــــــــــــــــــــــــــــــــــــــــــ

• العقل الواعي ده المسؤول عن جزء الحساب والمنطق في عقلك ، وعن الحركات الإراديه ، يعني مثلاً لو قولتلك حرك إيدك لـ فوق فأنت بتستخدم عقلك الواعي
• العقل اللاوعي وده المسؤول عن الحركات اللاإرادية و المشاعر و الذكريات و عن أفكارك و معتقداتك ، مثلاً أنت شايف شكلك مش حلو ، ده بيكون إعتقاد متخزن في عقلك الباطن وعشان تغيره لازم تتواصل مع عقلك الباطن

• طب إيه الفرق بين العقل الواعي والعقل الباطن ؟ = - مثال :

عملية التنفس بـ تتم لا إرادياً من غير ما تتحكم فيها … هنا عقلك الباطن اللي بيتحكم في عملية التنفس - لو قولتلك إتحكم في تنفسك وخد نفس عميق … هنا اللي بيتحكم في عملية التنفس عقلك الواعي

- مثال تاني :

لما تيجي تتعلم حاجة جديدة زي السواقة مثلاً فـ أنت أول ما بتتعلمها بـ تكون مركز جداً في البداية عشان تتعلم صح … هنا أنت بتستخدم عقل الوعي

بعد شوية لما خلاص أتقنت السواقه وسوقت العربية كتير فـ خلاص انت اتعودت عليها … هنا عقلك الباطن اللي شغال

• يعني الخلاصة : لما بتعمل حاجة لأول مرة وتتعلمها فـ أنت بتستخدم عقل الوعي ، ولما خلاص تكون اتعودت عليها هنا أنت بتستخدم العقل الباطن

أحد الدراسات بتقول إن (العقل الواعي) بـ يحتوي علي ٢٠٠٠ خلية دماغ ، بينما (العقل الباطن) بـ يحتوي علي ٤ مليون خلية دماغ

العقل الباطن ده له مجموعه من القوانين تمت صياغتها بناءاً علي بعض التجارب والدراسات ، فـ هي مش شرط تكون حقيقة ، وده اللي هتكلم عنه

١- قانون الإرتداد :

لو حاولت إنك تشوف شخص معين بـ كل الطرق الممكنة ، فـ الطرق دي كلها هـ تفشل و مش هتشوفه ، و لما الفكرة دي تتشال من دماغك غالباً هتشوف الشخص ده صدفة

مثال :

- لو شوفت الشخص اللي بتحبه في مكان معين الساعه ٣ مثلاً يوم السبت ، فـ تروح يوم السبت اللي بعده الساعه ٣ نفس المكان عشان تشوفه ، غالباً وبنسبة كبيرة مش هتشوفه ، وهتفضل تكررها كل اسبوع لحد ما هتزهق وأول ما خلاص تشيل الفكرة من دماغك هتلاقيه قدامك صدفه في أي مكان

٢- قانون النقاء :

لو سعيت للشهرة عن طريق مثلاً مساعدة غيرك فـ غالباً مش هـ تتشهر ، أما لو سعيت للـ حاجة دي [ مساعدة الناس في المثال ] ، فـ غالباً هـ تتشهر بسرعة

مثال :

- في عالم السوشيال ميديا بنلاقي كتير أشخاص بتتشهر صدفة وفجأة من غير ترتيب زي [ تريند سارة و كايا مثلاً ] في كذا شخص عمل دور كايا بس مفيش إلا شخص واحد بس اللي إتشهر وقال في أحد اللقاءات انه جربها ومكنش متوقع إنها هتكون تريند

٣- قانون التخاطر :

• لو فكرت في شخص وتوافقت بينكم الموجات لـ مدة دقيقتين [ يعني كان بيفكر فيك في نفس الوقت اللي كنت بتفكر فيه لمده دقيقتين ] ، فـ غالباً الشخص ده هيفكر فيك في منامه

مثال :

- غالباً بعد ما يحصل فراق بين الطرفين في البداية كدا تلاقي أحد الطرفين من كتر ما بيفكر في التاني ، بيحلم بيه في منامه و إنهم رجعوا لـ بعض أو إتكلموا تاني أو...

٤- قانون الجذب :

لو صدقت فكرة و آمنت بيها و بقت بـ تشغل أغلب أفكارك و خيالك فـ غالباً هتحققها لأن عقلك الباطن هو اللي هيوجهك لـ تنفيذ الفكرة ده بـ كل الوسائل الممكنة

مثال :

- لو بتتفرج علي كورة ، ريمونتادا برشلونة و باريس سان جيرمان من حوالي سنتين ، كان مستحيل حد يتوقع ان برشلونه يتأهل ، قبل الماتش [ نيمار ] نزل صورة علي الإنستجرام و كتب تحتها ١٪ فرصة ٩٩٪ ايمان ، و فعلاً برشلونة اتأهلت و كان نيمار نجم الماتش

٥- قانون المراسلات :

لو حسيت بـ الإرتباك و عدم التركيز فجأه و من غير أي سبب ، فـ غالباً في شخص بيفكر فيك في الوقت ده.

٦- قانون أولياء الله :

لو حسيت إن معظم أحلامك ومناماتك بـ تتحقق في الواقع ، ده غالباً معناه إنك صادق مع ربنا ومخلص له.

٧- قانون الإضطهاد :

لو لقيت إن كل الناس اللي بتقابلهم بـ يغدروا بيك أو بيتخلوا عنك ، فـ غالباً السبب في أفكارك التشاؤمية و سوء ظنك … طول ما أنت متوقع الوحش فـ الوحش هيحصل غالباً

مثال :

- غالباً ما بتلاقي شخص بيتوقع إن محدش مهتم به وحاطط في دماغه إنه لو إحتاج حد جمبه مش هيلاقي ، وأول ما يحصل الموقف ده ويحتاج حد يكون جمبه غالباً مبتلاقيش حد معاه وبيبعدوا عنه.

٨- قانون التواصل مع الحياة :

لو كانت حياتك صعبة وحظك أسود ، لكن عندك إحساس دائم بـ التفاؤل مش عارف سببه بـ الرغم من كل المصايب اللي بتحصلك ، غالباً ده معناه إن في حاجة هتحصلك في المستقبل و هتغير حياتك.